ઍનકાઉન્ટર : 14-08-2016

* આ બધા એનકાઉન્ટરો તમે જાતે કરો છો કે, શાર્પ-શૂટરોને સોપારી આપી દો છો ?

- આવી પવિત્ર હિંસા જાતે જ કરવી પડે !

(સમર્થ એ. સિહોરા, વડોદરા)

* તમે વૅલેન્ટાઇન-ડે કોની સાથે ઉજવો છો ?

- મારા છોકરાઓની બા સાથે.

(છત્રપાલસિંહ ગોહિલ, ભાવનગર)

* ચુસ્ત અને ટુંકા કપડાં પહેરીને સ્ત્રીઓ સુંદર દેખાવાની કોશિષ કરતી હોય, એવું મને લાગે છે...

- હા, પણ મારે એમાં શેની મદદ કરવાની છે ?

(ચંદ્રકાંત બગરીયા, પૂણે-મહારાષ્ટ્ર)

* ભાજપે સુબ્રમણ્યમ સ્વામીને બે વર્ષ પહેલા રાજ્યસભામાં મોકલ્યા હોત તો આજે ભાજપ ક્યાં હોત ને કૉંગ્રેસ ક્યાં હોત ?

- કોંગ્રેસ...? એ વળી શું છે ?

(ધ્રૂવી પ્રકાશ કાચા, અમદાવાદ)

* તમારી પાસે અંબાણીઓે જેટલો પૈસો હોત તો શું કરત ?

- તો ય 'ઍનકાઉન્ટર' તો મારે જ લખવું પડતું હોત !

(ઋત્વિક નાઈક, સુરત)

* ૧૦૦ ટકા પ્રામાણિક કર્મચારીઓ મેળવવા સરકારે શું કરવું જોઈએ ?

- એક-બે ટકા ઓછા રાખો ને, તો અમારા જેવા સો-બસ્સોને નોકરી મળે !

(મનહરસિંહ ઠાકોર, કમાણા-મહેસાણા)

* તમે હાસ્યલેખક ન હોત તો શું બનવા પ્રયત્ન કરત ?

- કાંઈ નહિ. હાસ્યલેખક બનવા માટે સાત જનમ લીધા છે.

(કવિતા મારૂ, શિહોર)

* આધાર-કાર્ડમાં મુખ્ય આધાર કોનો હોય છે ?

- કાગળનો.

(મયૂર જે. મહેતા, વડોદરા)

* બટેટા વિશે કાંઈ કહેશો ? હું બટેટાની ફૅન છું.

- અડધું બટેટું કાપીને એની ઉપર મને તમારો ઑટોગ્રાફ મોકલાવશો.

(જીજ્ઞાસા માંકડ, મુંબઈ)

* આ 'મધર્સ-ડે' ગયો, પણ કોઈએ ભારત માતાને યાદ કર્યા ?

- યસ. ગીતકાર જાવેદ અખ્તરે રાજ્યસભામાં ટેબલ પર હાથ પછાડી પછાડીને 'ભારત માતા કી જય'નું રટણ કર્યું છે.

(ચિંતન માખેચા, રાજકોટ)

* કોઈ પણ નાગરિક માટે પાંચ વર્ષ ફરજીયાત લશ્કરી-તાલીમ રાખવી ન જોઈએ ?

- ચારે બાજુથી દેશના લોકોને આવા વિચારો પ્રાપ્ત થાઓ.

(ડૉ. ક્રિષ્ણા વિશુ ટીલવા, રાજકોટ)

* આર્ટ ફિલ્મ અને કમર્શિયલ ફિલ્મ વચ્ચે શું તફાવત ?

- ₹ ૧૦૦ કરોડનો.

(પુષ્પેન્દ્ર નાણાવટી, ગાંધીનગર)

* સત્ય હંમેશા કડવું કેમ હોય છે ?

- કોઈ ચખાડે તો કહું.

(દીપક પંડયા, બિલિમોરા)

* મોદીજીને મળવું છે. શું કરવું ?

- કોઇ પણ દેશનો વિસા કઢાવી રાખો.

(હરેશ ભાનુશાળી, સિલવાસા)

* ભાજપનું મિશન રોડ-રસ્તા, કૉંગ્રેસનું મિશન 'અનાજ-સસ્તા', તો વિજય માલ્યાનું મિશન શું ?

- બૅન્કવાળા હાથ-ઘસતા.

(બ્રિજ જતિનભાઈ પટેલ, પાટણ)

* ભગવાનોને અબજો રૂપિયા ચઢાવાય છે, એને બદલે એટલા રૂપિયા દેશ માટે વપરાતા હોત તો ?

- આ તમે જે સમજ્યા, એ દેશના ધર્મગુરૂઓ સમજે અને શિષ્યોને આવો ઉપદેશ આપે, તો અમેરિકા કરતા આપણા દેશમાં સમૃદ્ધિ વધુ હોત !

(મુગ્ધા ઉલ્લાસ વોરા, જૂનાગઢ)

* આટલા ફટાફટ જવાબો કેવી રીતે આપી શકો છો ?

- મને પરણે ફક્ત ૪૦ વર્ષ જ થયા છે...! આટલામાં તો માણસ કેટલું કરી શકે ?

(મધુતલા માંકડ, મુંબઈ)

* અમારા મુંબઈ શહેરમાં તો કદી ભૂલા પડો...!

- મુંબઈમાં ભૂલા પડયા પછી નહાવા-ધોવાનું રોડ ઉપર રાખવું પડે છે !

(અપર્ણા ભદ્રેશ દેસાઇ, મુંબઇ)

* દેશની મુશ્કેલીઓ માટે હવે 'સીસ્ટમ'નો વાંક કાઢવાની ફૅશન થઈ ગઈ છે...!

- સીસ્ટમ સારી હોય તો પ્રજાનો વાંક કાઢવાના દહાડા ન આવે !

(જય એમ. આદ્રોજા, રાજકોટ)

* 'હાથી જીવતો લાખનો, મરેલો સવા લાખનો,' એનું કોઇ વાસ્તવિક ઉદાહરણ ?

- અરવિંદ કેજરીવાલ.

(જીતેન્દ્ર કેલા, મોરબી)

* મોદી સાહેબ ઇ.સ. ૨૦૧૯ સુધીમાં 'સ્વચ્છ ભારત અભિયાન' પૂરૂં કરવાનું કહે છે. તમને શું લાગે છે ?

- મારા કે તમારા શહેરના જાહેર રસ્તાઓ ઉપર માત્ર એક કચરાપેટી જોવા મળે, પછી કહું.

(ફૈઝલખાન નેદરીયા, ગાંધીનગર)

* સફળ લગ્નજીવન માટે શું જરૂરી છે ? લવ કે ઍડજસ્ટમૅન્ટ ?

- એક પત્ની.

(જયેશ અંતાણી, ભાવનગર)

* હું તમારા વિચારોથી પ્રભાવિત છું. મને કહો કે, શું આપણો દેશ આદર્શ રાષ્ટ્ર નહિ બની શકે ?

- દેશ કરતા ધર્મ અને જ્ઞાતિઓનું જોર ચાલતું રહેશે, ત્યાં સુધી તો નહિ જ !

(કુલદીપસિંહ ગોહિલ, કુકડ-ઘોઘા)

* આવી જોરદાર ગરમીથી બચવાનો કોઈ ઉપાય બતાવશો ?

- મેં મારા પૂરતો ઉપાય શોધી કાઢ્યો છે. હવે હું અડધો કલાકને બદલે છ-સાત કલાકે નહાઇને બાથરૂમની બહાર નીકળું છું.

(ફાતેમા મીયાજીવાલા, સિદ્ધપુર)

* ગુજરાતમાં ઘણા ગુજરાતી જાણતા હોવા છતાં હિંદીમાં કેમ બોલતા હોય છે ?

- સોનિયાજી ઇટાલિયન છે, છતાં હિંદીમાં બોલે છે ને ?

(મધુકર માંકડ, જામનગર)